देशभर ‘वसन्त’ लाई उत्साहजनक शो, एडभान्स बुकिङ्ग खुल्ला

चैत्र २२ गते शुक्रबारबाट रिलिज तयारीमा रहेको चलचित्र ‘वसन्त’ लाई प्रदर्शकले उत्साहजनक शो दिएको छ। रिलिजको केहि दिन अगाडी मल्टिप्लेक्सले शो खुल्ला गरेका हुन्। अहिलेसम्म चलचित्रले २५० बढी शो देशभरका मल्टीप्लेक्समा पाएको छ। रिलिजको दिनसम्म यो संख्यामा अझै वृद्धि हुने पक्का रहेको छ। प्रकाश सपुतको डेव्यु निर्देशनमा तयार भएको चलचित्र ३५०-४०० बढी शोमा प्रदर्शन आउने अनुमान गरिएको छ।

प्रकाश सपुतका सृजना र चलचित्र पछिल्लो समय सफल बन्दै आएका छन्। सोहि कारण पनि चलचित्रको ओपनिङ्ग अपेक्षाकृत हुने अनुमान गरिएको छ। यहि विश्वास प्रदर्शकले पनि राखेका छन्। आइतबार रामनवमीको विदा भएको कारण पनि चलचित्रले राम्रो व्यापार गर्ने अनुमान गरिएको छ।

चलचित्रमा प्रकाश सपुत, स्वस्तिमा खड्का, प्रभात पाल ठकुरी, श्री शिभान्सी, उर्मिला लाम्गादे र खड्क बहादुर पुन (खबपु), अनुप बराल, कमलमणी नेपाल, प्रकाश घिमिरे, विशाल पहारीको अभिनय रहेको छ । गलबन्दी प्रोडक्सनको प्रस्तुति रहने चलचित्रको निर्मातामा मोहन विश्वकर्मा र बिन्दु बोहोरा तथा कार्यकारी निर्मातामा अनुरोध भट्टराई, नाना थकाली र विरेन्द्र नारायण श्रेष्ठ छन् । विपन्न विश्वकर्मा समुदायको छोराको लेखक बन्ने सपना र लक्ष्य हासिल गर्न उसले गर्ने संघर्षको कथा चलचित्रले भन्ने छ।

यो चलचित्रलाई सेन्सर बोर्डले युनिभर्सल सर्टिफिकेट दिएको छ । अब यो चलचित्र हरेक उमेर समुहका व्यक्तिले हेर्न सक्नेछन्। सुसन प्रजापतिले खिचेको चलचित्रलाई प्रविन भट्टले सम्पादन गरेका छन्। चलचित्रको सह- निर्देशक सुनिल विक हुन्।