संघर्ष र पिडाको बीचमा यसरी तयार भयो ‘लाज शरणम्’ मा सितारामको गेटअप
आफ्ना पात्रलाई टेलिचलचित्र, छोटा चलचित्र, विज्ञापन र चलचित्रहरूमा फरक फरक रुपमा प्रस्तुत गर्न सफल कलाकारको रुपमा रहेका छन् , सिताराम कट्टेल ‘धुर्मुस’। हास्य टेलिसिरियल ‘मेरी बास्सै’ मा नै विभिन्न पात्रको अभिनय गरेर उनले आफुलाई अब्बल कलाकारको रुपमा पटक पटक प्रमाणित गरिसकेका छन्। यतिबेला उनि प्रमुख भूमिकामा रहेको चलचित्र ‘लाज शरणम्’ हलमा प्रदर्शनरत रहेको छ। उनको क्यारेक्टरको चर्चा पोष्टर, ट्रेलर देखि अहिले हलसम्म पनि चलिरहेको छ । यो पात्रमा उनले गरेको लुक्स परिवर्तनको मिहेनत देखिएको छ।
कसरी तयार भयो त सितारामको यो नयाँ क्यारेक्टर?
जब ‘लाज शरणम्’का लेखक तथा निर्देशक कुमार कट्टेल जिग्री र उनको समूहले स्क्रिप्ट तयार पार्यो र सक्किगोनी टिमको तर्फबाट यो चरित्र निर्वाह गर्नका लागि धुर्मुसलाई प्रस्ताव गर्यो । सुरुमा धुर्मुस आश्चर्यमा परे । यो चरित्र मलाई सुहाउला त भन्ने दोधारमा परे । तर पनि निर्देशक कुमार कट्टेल, श्रीमती कुन्जना घिमिरे ‘सुन्तली’, दीपक आचार्य ‘काकु’, अर्जुन घिमिरे ‘पाँडे’ ले उनलाई हौसला दिए । तर धुर्मुस भने उक्त चरित्र गर्न नपाए हुन्थ्यो भन्नेमा थिए ।
एक दिन चरित्रका लागि निर्देशक कुमार कट्टेल स्क्रिप्ट सुनाउन जाँदा धुर्मुसले गर्नुभन्दा बरु आफू अरू नै कुनै चरित्र दिन आग्रह गरे । तर निर्माण टिमको आग्रह र निर्देशकको विश्वासलाई धुर्मुसले अस्विकार गर्न सकेनन् र चरित्रको लागी तयार भए। सितारामलाई यो पात्रको लागी तौल बढाउनु पर्ने थियो र फरक लुक्समा देखिनुपर्ने चुनौती पनि। उनलाई हरेक समय आफ्नो चरित्रलाई फरक फरक बनाउन सहयोग गर्ने व्यक्तिहरुको साथमा उनी जुटे।
उनी मुस्कान डेन्टल क्लिनिकमा दाँत बनाउन पुगे । मेरी बास्सैका खड्काजी, मुस्कान पासा, खडानन्द गुरुलगायत चरित्र बनाउन यहि क्लिनिकले उनलाई सहयोग गरेको थियो। दाँत पछि नाक बनाउन उनी मेकअप आर्टिस्ट विनोद श्रेष्ठकोमा पुगे। स्याम्पल टेस्ट भएपछी माक्स मेकअपबाट फरक क्यारेक्टर निस्किन सक्छ भन्ने सुझाव पाएपछि सितारामको माक्स बनाउने काम सुरु भयो। तर विडम्बना मास्क बनाउने स्याम्पल तयार पार्दा केमिकलले उनको टाउकाको कपालसहित छालामा समेत निस्किन पुग्यो । उनी त्यसको उपचार गर्न क्यूटीस् केयर अस्पतालका सञ्चालक डाक्टर धर्मेन्द्र कर्णकोमा पुगे ।
कपाल चाँडो उम्रिन समय लाग्ने र चलचित्रको छायांकन तुरुन्तै हुने भएपछि निर्देशक कट्टेलले कपाल नभएका फरक-फरक चरित्रका स्केजहरु धुर्मुसलाई देखाउन थाले । धुर्मुस पनि बीचमा तालु र साइड साइडमा कपाल भएको नयाँ क्यारेक्टरको खोजीमा लाग्न थालेका थिए ।
एउटा क्यारेक्टर मोटामोटी उनले फाइनल गरे तर सो क्यारेक्टरका लागि १० केजी तौल बढाउनुपर्ने थियो । पहिला मोटोपनका कारणले कोलस्टोर, युरिक एसिडको सामना गरिरहेका धुर्मुस जब डाक्टर कर्टकोमा पुगे । सो रोगबाट मुक्त भएका थिए फेरि मोटाउनुपर्ने बाध्यता भए पनि उनी पुनः डाक्टर कर्टकोमा पुगे । कर्टले सुरुमा त चुनौती नमोल्न सुझाव दिए । पछि प्रत्यक्ष निगरानीमा बसेर मोटाउने सल्लाह दिए बमोजिम धुर्मुस मोटाउन सुरु गरे । छायांकनमा नजाँदै पुनः उनको कोलस्टोर बढ्न थाल्यो । उनलाई डर लाग्न थाल्यो । उनी अन्य कलाकारहरूबाटै सो चरित्र निर्वाह भइदिए हुनेथियो भन्नेमा थिए ।
त्यही बेला निर्माण टिमले भारतीय अभिनेता गोबिन्दाले नेपाली चलचित्रमा खेल्ने रुचि राखेको विभिन्न सञ्चार माध्यमबाट थाहा पाएपछि उनलाई नै उक्त चरित्र गर्नका लागि गीतकार, गजलकार तथा संस्कृतविद् धिरेन्द्र प्रेमर्षिमार्फत हिन्दीमा स्क्रिप्ट बनाएर गोबिन्दालाई पठाए । उनले चरित्र रुचाए पनि समय अभावका कारण सोही समयमा आफू उपलब्ध हुन नसक्ने बताए । त्यसपछि धुर्मुस विभिन्न ब्यक्तित्वहरुसँग भेटघाट र छलफलमा लागे ।
उनी धेरै ठाउँमा पुगे पनि अझ आफूभन्दा जीवन्त भूमिका भइदिए चलचित्रलाई राम्रो हुने ठानेर कलाकार रवीन्द्र झालाई समेत उनले प्रस्ताव गरे । तर छोटो समयमा तौल बढाउन नसकिने र व्यस्त भएका कारणले उनी पनि पछि हटे । अन्तत: धुर्मुसले उक्त पात्र निर्वाह गर्ने निर्णय गरे र उनी मोटाउँदै थिए । कोलस्टोर मात्र नभएको उनीमा युरिक एसिड पनि बढेपछि उनी खुट्टा समेत टेक्न नसक्ने अवस्थामा पुगे ।
जब उनी उक्त चरित्रलाई भनेर यस्तो स्वरूपमा आए तर निर्माण टिमले वैशाखको अन्तिम साताबाट छायांकनका लागि तयारी गरेको चलचित्रको छायांकन रोकिन पुग्यो । छायांकन रोकिएपछि धुर्मुस जीवनसाथी सुन्तलीसहित धुर्मुस सुन्तली साँझका लागि युरोपका विभिन्न देशहरूको भ्रमणमा निस्किए ।
युरोपमै हुँदै गर्दा उनलाई हाल ‘लाज शरणम्’ मा गरिएको चरित्रको परिकल्पना हुन पुग्यो । उनले युरोपबाटै मेकअप आर्टिस्ट गणेश अछामीलाई सम्पर्क गरे र अछामीले भारतबाट सामान मगाउने सुझाव दिए । सोही अनुसार उक्त चरित्र बनाउने सामाग्रीहरू जुट्दै गयो ।
जब धुर्मुस नेपाल आइपुगे र निर्माण टिमले भदौको अन्तिम साताबाट छायांकनका लागि जाने तयारी गर्यो । धुर्मुसको चरित्रको स्याम्पल टेस्ट गरियो सबैलाई बेग्लै प्रकारको ऊर्जा पैदा भयो र धुर्मुस छायांकनका लागि निर्माण टिमसँगै डोल्पा पुगे ।
एकातिर हाई अल्टिच्युट र शरीरको तौल धेरै भएको कारण उनलाई छायांकन गर्न समेत कठिन भयो । जब उनी डोल्पाको छायांकन सकेर काठमाडौं आए उनको स्वास्थ्यमा समस्या देखापर्न थाल्यो । कोलस्टोर अत्याधिक बढेको र रगतमा बोसोको मात्रा अत्याधित भएको कारण रगत पातलो बनाउन औषधि सेवन गर्दै, पटक पटक मुटुको ई सिजी गर्दै छायांकनमा सहभागी भइरहे । छायांकनको अन्त्य अन्त्यतिर आउँदा शरीरभरि फोकैफोका देखापर्न थाल्यो । पुनः डाक्टर धर्मेन्द्र कर्णकोमा पुगेर स्किनको उपचार गराउन थाले । एकातिर कोलस्टोरको औषधि सेवन अर्कातिर स्किनको औषधि सेवन गर्दै उनले छायांकनलाई पूरा गरे ।
आफ्नो स्वास्थ्यलाई नै जोखिमा मोलेर निर्वाह गरेको पात्रले तरंग पैदा गयो। पोष्टर रिलिज देखि नै चर्चा मा रहेको चरित्रलाई यतिबेला हलमा दर्शकले हेरिरहेका छन्। उनको पात्रको कारण नै चलचित्रले एक हाइप प्राप्त गर्यो। सिताराम यतिबेला तीनै संघर्ष, अनि दर्शकमा प्राप्त कौतुहलतालाई लिएर खुशी रहेका छन्।
