‘मोहर’ को सेटबाट चलचित्र छायांकनमा फर्किए पल शाह
अभिनेता पल शाहको क्रेज गज्जबको छ । लोकप्रियताको शिखरमा रहेको बेला केहि समय ब्रेक लागेका पल शाहको व्यस्ततामा कुनै कमि रहेको छैन। जेठमा ‘पूजार सार्की’ र भदौमा ‘रावायण’ रिलिज पश्चात उनको पाइपलाइनमा अझै केहि चलचित्र रहेका छन्। उनको नयाँ चलचित्र ‘मायावी’ फागुनमा रिलिज हुँदैछ।
चलचित्रको सुटिङ्गमा केहि समय ब्रेक लगाएर म्युजिक भिडियो र मेला-महोत्सवमा व्यस्त रहेका पल पुन: चलचित्रको सुटिङ्गमा जोडिएका छन्। उनको नयाँ चलचित्र ‘मोहर’ को छायांकन सुरु भएको छ। काठमाडौंको कागेश्वरीस्थित गागलफेदीबाट चलचित्रको छायांकन सोमबारबाट सुरु भएको हो।
चलचित्रमा पल शाह संगै बेनिशा हमाल र नीति शाह प्रमुख भूमिकामा रहेका छन्। चलचित्रमा मिथिला शर्मा, लक्ष्मी गिरी, रबिन्द्र झा लगायतको पनि अभिनय रहनेछ । चुम्बन जङ्ग शाही निर्माता रहेको चलचित्रलाई ओम प्रतिकले निर्देशन गर्दैछन्। काठमाडौंसहित दाङ र रोल्पामा खिचिने बताइएको चलचित्रको रिलिज लक्ष्य २०८२ मा रहेको छ।
