धिरज र मिरुनाको ‘कुस्ती’ मा दिकिला शेर्पा

एमटीभीको चर्चित भारतीय रियालिटी शो ‘स्प्लिट्सभिल्ला’ सिजन ५ बाट चिनिएकी दिकिला शेर्पाको नेपाली चलचित्रमा डेब्यु गर्ने पक्का भएको छ । कलाकार बुद्धी तामाङको निर्माण रहने चलचित्र ‘कुस्ती’ मा अभिनेत्री शेर्पा अनुबन्धित भएकी छिन् । उनले चलचित्रको निर्माण टिमसँग सम्झौता गर्दै वर्कशप ज्वाईन गरिसकेकी छिन् । आउँदो फागुनको पहिलो सातादेखि छायाङ्कनमा जाने चलचित्रमा उनको भूमिका महत्वपूर्ण हुने निर्देशक तथा लेखक अनिल योञ्जनले जानकारी दिए ।
उनले भने,‘हामीलाई एउटा फ्रेश अनुहार चाहिएको थियो । दिकिलालाई भूमिका सुहाउँदो भएपछि अफर गरेका हौँ, उहाँले सम्झौता गरेर वर्कशपमा हुनुहुन्छ । उहाँ निकै उत्साहित हुनुहुन्छ ।’

निर्देशक योञ्जनले आउँदो वर्ष विसं २०८२ को भदौमा दर्शकले दिकिलालाई पर्दामा हेर्न पाउने जानकारी दिए । उनले म्युजिक भिडिओमा देखेपछि दीकिलासँग चलचित्र बारे परामर्श गरेका थिए । दीकिलाले भारतबाट नेपाल आएर चलचित्रको पात्रका लागि ‘स्क्रीन टेस्ट’ दिएर छनोट भएको निर्देशक योञ्जनले जानकारी दिए । डेब्यु गर्ल दिकिलाले वर्कशपले आफूमा छुटै उत्साह थपेको बताइन ।

उनले भनिन्,‘यो मेरो पहिलो चलचित्र भएकाले निकै उत्साहित छु । मलाई सुहाउँदो भूमिका, मैले मन पराउने सिनियर कलाकार, भद्र र सालिन टीमले मलाई अभिनेत्री बन्न प्रेरित गर्यो । म आफूले धेरै मेहनत गरेर सक्दो बेस्ट दिने कोसिश गर्ने छु । मैले पाएको मायालाई बढाउने काम चलचित्रमा गर्ने छु ।’

उनी धिरज मगर र मिरुना मगरको को–स्टार भएर सेट ज्वाईन गर्न अधैर्य छिन् । अनुषा सिनेमावुड पिक्चर्स प्रालीको व्यानरमा बन्ने चलचित्र ‘कुस्ती’ मा छुटिन नसक्ने र सँगै रहन पनि नसक्ने जोडीको प्रेम कथामा आधारित रहेको निर्देशक योञ्जनले बताए । यसमा धिरज मगर र मिरुना मगर पहिलोपटक स्क्रीन जोडी बनेर प्रस्तुत हुँदैछन् ।