दर्शकले रुचाए प्रकाश र स्वस्तिमाको जोडी, युट्युवमा ‘वसन्त’ गीतलाई सफलता

प्रकाश सपुतका सांगीतिक सिर्जनाहरु सधै चर्चामा रहने गर्दछन्। गीत रिलिज हुनसाथ सामाजिक संजालमा यसको चर्चा सधै हुने गर्दछ। गायन संगै अभिनयमा होमिएका प्रकाश यतिबेला चलचित्र निर्देशनमा उत्रिएका छन् । उनै सपुतको पहिलो निर्देशकीय चलचित्र ‘वसन्त’ चैत्र महिनामा रिलिज हुँदैछ। शनिवार चलचित्रमा समावेश पहिलो गीत ‘साँझ पर्यो झमक्क’ रिलिज भएको छ। रिलिज संगै चर्चामा आएको यो गीत यतिबेला युट्युबको ट्रेन्डिङ अर्न्तगत म्युजिक सेक्सनको दोश्रो स्थानमा रहेको छ । १५ लाख बढी दर्शकले हेरेको यो गीतलाई प्रसंसा मिलिरहेको छ।

गायक, अभिनेता तथा निर्देशक सुपतले नै शब्द रचना र संगीतमा तयार पारेको गीतको अडियो र भिडियो दुवै पक्ष अब्बल रहेको प्रतिक्रिया पाइरहेको छ । गीतमा प्रकाशलाई गायिका शान्ति श्री परियारले आवाजमा साथ दिएकी छिन्। शान्ती र प्रकाशको सहकार्यमा धेरै सुपरहिट गीत बनेका छन्। भिडियोमा प्रकासको जोडी अभिनेत्री स्वस्तिमा खड्कासंग बाँधिएको छ। चलचित्रमा पनि यी दुवैको जोडी देख्न सकिनेछ। चलचित्र गीतमा स्वस्तिमाले लगातार सफलता हासिल गर्दै आएकी छिन्।

चलचित्रमा प्रकाश सपुत, स्वस्तिमा खड्का, प्रभात पाल ठकुरी, श्री शिभान्सी, उर्मिला लाम्गादे र खड्क बहादुर पुन (खबपु), अनुप बराल, कमलमणी नेपाल, प्रकाश घिमिरे लगायतका कलाकारको पनि अभिनय रहेको छ । गलबन्दी प्रोडक्सनको प्रस्तुति रहने सोसल ड्रामा चलचित्रको कथा, पटकथा र संगीत पनि सपुतले नै तयार पारेका हुन् ।

विपन्न विश्वकर्मा समुदायको छोराको लेखक बन्ने सपना र लक्ष्य हासिल गर्न उसले गर्ने संघर्षको कथा चलचित्रले भन्ने छ । चलचित्रको निर्मातामा मोहन विश्वकर्मा र बिन्दु बोहोरा तथा कार्यकारी निर्मातामा अनुरोध भट्टराई, नाना थकाली र विरेन्द्र नारायण श्रेष्ठ छन् ।