‘ऊनको स्वीटर’ को विदेश डिमाण्ड, नेपालसंगै यी देशमा एकसाथ प्रदर्शन

विपिन कार्की र मिरुना मगर प्रमुख भूमिकामा रहेको चलचित्र ‘ऊनको स्वीटर’ को ओभरसिज प्रदर्शन अधिकार धमाधम बिक्रि भैरहेको छ। चलचित्रका पोष्टर र सार्वजनिक गीत ‘मखमली’ को राम्रो क्रेज बढ्दा यसको विदेश प्रदर्शन माहोल बढेको हो। चलचित्रको अमेरिका, अस्ट्रेलिया र मध्यपूर्वका देशहरूसँगै माल्टा र मलेसियाको प्रदर्शन अधिकार प्याट्रिक सुवेदी र रमेश ढकाल नेतृत्वको ‘सेभेन सिज इन्टरनेशनल फिल्म्स्’ले खरिद गरेको छ। यी देशहरुमा नेपाली चलचित्रलाई पुर्याउन ‘सेभेन सिज इन्टरनेशनल फिल्म्स्’ ले लामो समयबाट भूमिका खेलिरहेको छ ।

यस्तै, दक्षिण कोरियाको लागि ‘पाँचथर सेवा समाज,’ क्यानडाको लागि ‘एमजिपी इन्टरटेनमेन्ट,’ ‘आँगन इभेन्ट,’ र ‘आई र यू इन्टरटेनमेन्ट ’ले खरिद गरेका छन् भने युके बाहेकका युरोपियन देशहरूमा ‘मामा इभेन्टस्’ र ‘गुरुङ केएनएस इन्टरटेनमेन्ट,’ र जापानमा ‘सेवा एलएल कम्पनी’ले ‘ऊनको स्वीटर’ प्रदर्शन गर्ने निर्देशक नवीन चौहानले बताए । यि सबै देशहरूमा नेपालको मितिमा नै एकसाथ चलचित्र रिलिज हुनेछ।

२०८२ सालको वैशाख २६ गते चलचित्र रिलिज हुनेछ। करिव ४० लाख भ्युज प्राप्त गरेको ‘मखमली’ गीत नेपाल सहित नेपालीहरूको उल्लेख्य बसोबास रहेका माल्टा, कतार, अस्ट्रेलिया, युएई, कुवेत लगायतका देशहरूमा पनि ट्रेन्डिङको शीर्ष स्थानसम्म पुगेको थियो । ‘ऊनको स्वीटर’ आर्टमाण्डू प्रा.लि.को निर्माणमा बनेको पहिलो फिचर चलचित्र हो । चलचित्रलाई नवीन चौहानले निर्देशन गरेका हुन् भने सुरज कटुवालको सह लेखन रहेको छ ।

चलचित्रमा विपिन कार्की, मिरुना मगर, सुनिल पोखरेल, माओत्से गुरुङ, विल्सन विक्रम राई, प्रेम सुब्बा, एलेक्स पारस, परीक्षा लिम्बु, सुरज तमू, र भावना खपाङ्गी मगरलगायतको अभिनय रहेको छ ।