दया र आंचलको रोमान्टिक मुडमा ‘दु:खी आत्मा’ पोस्टर, भ्यालेन्टाइन डे मा रिलिज हुँदै

दयाहाङ राई र आंचल शर्मा मुख्य भूमिकामा रहेको चलचित्र ‘दु:खी आत्मा’ फागुन २ गतेबाट रिलिज हुँदैछ। भ्यालेन्टाइन डेको अवसार पारेर रिलिज हुन लागेको चलचित्रको टिमले रोमान्टिक पोष्टर सार्वजनिक गरेको छ। तीन फरक पोष्टरमा चलचित्रका कलाकारहरुको मुड दर्शाउन खोजिएको छ।

एक पोष्टरमा दया र आंचल रोमान्टिक देखिएका छन्। दयाले आंचलको निधारमा चुम्बन गरेका छन्। आंचल र दयाको रोमान्टिक दृश्य यस अगाडी चलचित्र ‘डिग्री माइला’ को गीतमा पनि देखिएको थियो। एक पोष्टरमा दया एक्लै फिचर रहेका छन् भने अर्को पोष्टरमा दयाहाङ र आँचलसहित अनुप विक्रम शाही, बुद्धि तामाङ, अशान्त शर्मा, लोकेन्द्र लेखक र रेअर राई पनि चित्रित छन् ।

दिपेन्द्र लामाको लेखन तथा निर्देशन रहेको चलचित्रलाई हिमाल कडरियाले निर्माण गरेका छन्। दिपेन्द्र र हिमालले यस अगाडी चलचित्र ‘नाङ्गो गाउँ’मा सहकार्य गरेका थिए ।
क्लक वर्क कृएसनको ब्यानरमा निर्माण भएको चलचित्रको कार्यकारी निर्मातामा सुदीप ढकाल छन् । चलचित्रमा चर्चित कवि श्रवण मुकारुङले विभिन्न शीर्षकमा तयार पारेको १० वटा कविता समेटिएको छ ।