फागुन २ मा सलोनको ‘रंगी’ रिलिज तय

सलोन बस्नेतको प्रस्तुतीमा तयार भएको चलचित्र ‘रंगी’ को रिलिज मिति तय भएको छ। चलचित्रको पोष्टर र मोसन पोष्टर सार्वजनिक गर्दै चलचित्रको टिमले आगामी फागुन २ गतेलाई रिलिज मिति तय गरेको हो। सान्भी इन्टरटेनमेन्ट प्रालिको व्यानरमा निर्माण भएको चलचित्रलाई सुरेश न्यौपानेले निर्देशन गरेका छन्।

सार्वजनिक पोष्टरमा कलाकार सलोन बस्नेत र बाल कलाकार आयुषी ढकाललाई स्थान दिइएको छ । ग्रामीण बजारलाई पृष्ठभूमिमा राखेर तयार पारिएको पोस्टरमा आयुषी र सलोनलाई गम्भीर भावमा देखाइएको छ । त्यस्तै मोसन पोस्टरमा सलोन, आयुषी र ‘डेब्य’ नायिका नम्रता श्रेष्ठलाई देख्न सकिन्छ ।

चलचित्रमा सलोन बस्नेत, नम्रता श्रेष्ठ, दिलीप रायमाझी, आयुषी ढकाल, उत्तम केसी, सुमिन गुरुङ, र विशाल पहारीको अभिनय छ । सक्षम सुवेदी र करिश्मा केसी बस्नेतको निर्माण रहेको चलचित्रमा सुमन गजमेरको लेखन, सौरभ लामाको छायांकन, दुर्गेश थापा, आमेश भण्डारी र भीम बिसीको संगीत, आनन्द कार्की, आमेश भण्डारी, भीम बिसी, समीक्षा अधिकारी र सुजता केसीको स्वर रहेको छ।