‘माइतिघर’ मा केदार र उपासना पक्का, दशैँमा रिलिज तयारी

रोहित अधिकारीको निर्माणमा तयार हुने चलचित्र ‘माइतिघर’ मा अभिनेत्री उपासना सिंह ठकुरी अनुबन्धित भएकी छिन्। केहि दिन अगाडी थिम पोष्टर सार्वजनिक गर्दै घोषणा गरिएको चलचित्रमा उपासना अनुबन्ध भएको खबर बाहिरिएको हो। चलचित्रमा उपासनाको साथमा केदार घिमिरे पनि अनुबन्ध भएको खबर रहेको छ। अन्य नाम चलेका कलाकारलाई चलचित्रमा अनुबन्ध गर्ने तयारीमा निर्माण टिम रहेको छ ।

रामशरण पाठकको लेखन रहेको चलचित्रमा रविन शेरचन र धिरज तामाङ निर्माता र चन्द्रकुमार दोङ र ईश्वर श्रेष्ठ कार्यकारी निर्माताको रुपमा रहेका छन् । केही महिनामा छायांकन सुरु हुने चलचित्रलाई मिलन तामाङले निर्देशन गर्दैछन्। आउँदो बर्षको दशैंको फूलपातिबाट चलचित्र रिलिज गर्ने घोषणा निर्माणपक्षले गरिसकेको छ ।
पछिल्लो रिलिज ‘खुस्मा’ को सफलतापछि उपासनाको करियर गति झन् बढेको छ । केदार पनि छक्का पन्जा टिम बाहिर लगातार काम गरिरहेका छन्।