एकसाथ आंचलका दुई चलचित्र रिलिज, फागुन २ मा ‘दुःखी आत्मा’ र ‘जेरी अन टप’

‘भ्यालेन्टाइन डे’को अवसर पारेर आगामी फागुन २ गतेबाट चलचित्र ‘दुःखी आत्मा’ रिलिज तय भएको छ। दयाहाङ राई र आंचल शर्मा मुख्य भूमिकामा रहेको चलचित्रले यो मितिमा रिलिज तय गरेको हो। दीपेन्द्र लामाको निर्देशनमा तयार भएको चलचित्रमा दयाहाङ र आँचलसहित अनुपविक्रम शाही, बुद्धि तामाङ, रेअर राई लगायतको अभिनय छ । हिमाल कडरिया निर्माता रहेको चलचित्रको कार्यकारी निर्माता सुदीप ढकाल हुन्।

यहि मितिमा अर्को चलचित्र ‘जेरी अन टप’ रिलिज कन्फर्म रहेको छ। अनमोल केसी, जसिता गुरुङ्ग, आंचल शर्मा, भुवन केसी, विपना थापा, केदार घिमिरे लगायतका कलाकारको अभिनय चलचित्रमा रहेको छ । यो चलचित्रले छायांकन अगावै आफ्नो रिलिज मिति तय गरेको थियो ।

रोचक कुरा चै के रहेको छ भने दुवै चलचित्रको लिड भूमिकामा अभिनेत्री आंचल शर्मा रहेकी छिन्। यहि दुई चलचित्रको सेड्युल मिलाउने चक्करमा उनले अर्को चलचित्र ‘बलिदान’ छाडेकी छिन् । आफ्ना चलचित्रले आफ्नैलाई असर नगरोस् भनेर सुटिङ्गमा सेड्युल र माहोल मिलाएकी आंचललाई रिलिज समयमा भने आपत पर्ने पक्का देखिएको छ।

अर्को दुवै मल्टिस्टारर चलचित्र हुन्। दुई ठुला चलचित्रको भिडन्तमा माहोल बन्ने र एकअर्काको प्रमोशन हुने समेत गरेको छ। दुई चलचित्र मात्र रिलिज भएमा बजारले पनि धान्ने प्रमाणित भैसकेको छ।