हलमा प्रकाश र स्वस्तिमाको ‘वसन्त’ रिलिज, उच्च शो बीच कस्तो होला ओपनिङ्ग?

प्रकाश सपुतको निर्देशनमा तयार भएको चलचित्र ‘वसन्त’ आजबाट हलमा रिलिज भएको छ। गायक र अभिनेताको रुपमा आफुलाई स्थापित गरेका सपुतलाई चलचित्र निर्देशकको रुपमा प्रमाणित गर्ने सुनौलो अवसर रहेको छ। म्युजिक भिडियोको उनको कथा वाचन शैलीले गर्दा पनि चलचित्रलाई लिएर दर्शक अपेक्षाकृत रहेका छन्।

व्यावसायिक र समीक्षात्मक पाटोमा आफुलाई अब्बल प्रमाणित गर्ने परिक्षामा आजबाट प्रकाश हलमा वसन्त लिएर आएका हुन्। चलचित्रलाई देशभर उच्च शो मिलेको छ। झन्डै ४ सय शो प्रदर्शकले चलचित्रलाई दिएका छन्। चलचित्रको गीत, ट्रेलर र सार्वजनिक प्रमोसनलले कन्टेन्टले दर्शकको राम्रो साथ पाएका छन्। यस कारणले पनि चलचित्रलाई प्रदर्शकले उच्च शो दिएका छन्।

चलचित्रमा प्रकाश सपुत, स्वस्तिमा खड्का, प्रभात पाल ठकुरी, श्री शिभान्सी, उर्मिला लाम्गादे, खड्कबहादुर पुन, अनुप बराल, कमलमणी नेपाल, प्रकाश घिमिरे लगायतको पनि अभिनय रहेको छ । विश्वकर्मा समुदायको एक युवकको लेखक बन्ने सपना र त्यसका लागि उसले गर्ने संघर्षको कथामा चलचित्र निर्माण भएको छ। गलबन्दी प्रोडक्सनको प्रस्तुति रहने चलचित्रको निर्मातामा मोहन विश्वकर्मा र बिन्दु बोहोरा तथा कार्यकारी निर्मातामा अनुरोध भट्टराई, नाना थकाली र विरेन्द्र नारायण श्रेष्ठ छन् । चलचित्रले शनिबार र आइतबारको विदाको फाइदा उठाउन सक्नेछ । बिहानीका शोमा शोचेजस्तो अकुपेन्सी देखिएको चलचित्रको ‘वर्ड अफ माउथ’ र भोलिको उपस्थितिले व्यापारिक आँकडा आंकलन गर्नसकिनेछ।