‘के घर के डेरा २’ पोष्टरमा निश्चल, खगेन्द्र देखि केकी उपासनासम्म

बिहिबार निर्देशक दिपेन्द्र के खनालले आफ्नो जन्मदिन मनाए। भिन्न जनराका चलचित्र निर्देशनमा आफुलाई अब्बल स्थापित गरिसकेका खनालको नयाँ निर्देशकीय चलचित्र ‘के घर के डेरा: घर नं २’ जेठ २ गतेबाट रिलिज हुँदैछ। उनको जन्मदिनको अवसर पारेर चलचित्रका तीन पोष्टर सार्वजनिक गरिएको छ। मानिसका इमोसनका भिन्न मुडहरुलाई पोष्टरमा चित्रित गरिएको छ।

सार्वजनिक एक पोष्टरमा निश्चल बस्नेत तनावपूर्ण भावमा दौडीरहेका छन्। अर्को पोष्टरमा खगेन्द्र लामिछाने र उपासना सिंह ठकुरी प्रेमभावमा देखिएका छन्। साइकल डोर्याउदै उपासनाको पछि खगेन्द्र देखिएका छन्। अर्को पोष्टरमा ६ वटा झ्यालमा चलचित्रका कलाकारको भिन्न मुडमा देखिएका छन्। उक्त पोष्टरमा निश्चल, खगेन्द्र र उपासनासहित आर्यन सिग्देल, केकी अधिकारी, प्रकाश घिमिरे, श्रृजना नापित लगायत चित्रित छन् ।

एप्पल इन्टरटेन्मेन्ट, ए प्लस इन्टरटेन्मेन्ट तथा नटराज क्रियशनको प्रस्तुतिमा निर्माण भएको चलचित्रमा नकिम उद्दिन, शरद श्रेष्ठ तथा किरण महर्जन निर्माता तथा युवराज कार्की कार्यकारी निर्मातामा छन् । चलचित्रलाई साहित्यकार बुद्धि सागरले लेखेका छन्।