बक्स अफिसमा झन् बलियो बन्दै ‘अन्जिला’

चलचित्रको व्यापार र भाग्यलाई कम सम्झन हुन् भन्ने अर्को उदाहरण बनेको छ , ‘अन्जिला’। यहि बर्ष रिलिज भएको चलचित्र ‘पूर्णबहादुरको सारंगी’ ले व्यवसायिक इतिहास नै कायम गरेको छ। व्यापारिक हिसाबले त्यो उचाइ पुग्न नसके पनि अन्जिलाले धेरै प्रदर्शक र चलचित्रको भविस्य आंकलन गर्ने पण्डितलाई नयाँ संदेश दिएको छ। नेपाली महिला फुटबल टोलीकी क्याप्टेन र गोलरक्षक एन्जिला तुम्बाफे सुब्बाको जीवन कथामा आधारित भएर निर्माण भएको चलचित्रको वर्ड अफ माउथ अब्बल रहेको छ।

एन्जिला स्वयं प्रमुख भूमिकामा रहेको चलचित्र हेरेर अधिकांश दर्शक रोएका छन्। मिडियाका क्यामेरा अगाडी मात्र हैन टिकटकमा पनि दर्शक रोएका स्वतः स्फुर्त भिडियो भाइरल भैरहेका छन्। रिलिजको चौथो हप्ता पुग्दा पनि चलचित्रका लागि दर्शकको अभाव रहेको छैन। रिलिजको चौथो हप्तामा झन्डै १४० शो सहित प्रदर्शन भैरहेको छ। रिलिजको पहिलो दिन चलचित्रलाई ७०-८० शो प्राप्त भएको थियो। नेपाली हलमा भारतीय स्टार सलमान खानको ‘सिकन्दर’ रिलिज भैरहेको छ। तर यो चलचित्र माथी अन्जिला भारी परिरहेको छ।

चलचित्रलाई दर्शकले दिएको प्रेमले एन्जिलालाई ग्रिस बाट नेपाल तान्यो। ग्रिसमा व्यवासायिक फुटबल खेलिरहेकी एन्जिला केहि दिनको समय मिलाएर नेपाल आइन्। उनले काठमाडौं, धरान, इटहरी, झापा, विराटनगर, पोखरा र नेपालगन्ज लगायतका स्थानमा दर्शक भेट्न पुगिन्। हल पुग्दा दर्शकले उनलाई दिएको सम्मान र प्रेम लोभलाग्दो रहेको थियो। दर्शक भेटेर उनि ग्रिस फर्कने तयारीमा रहेकी छिन्।

मिलन चाम्सको निर्देशनमा तयार भएको चलचित्रमा एन्जिलाको साथमा प्रेमकुमार श्रेष्ठ, सुनिल थापा,दयाहाङ राई, माओत्से गुरुङ्ग, सिर्जना सुब्बा, विजय बराल, सुमिन गुरुङ्ग लगायतका कलाकारको अभिनय रहेको छ।