दिपकको निर्माणमा चलचित्र ‘हे माया’ बन्ने, जुनीमले निर्देशन गर्ने

दीपक लम्सालको लगानीमा चलचित्र ‘हे माया’ निर्माण हुने भएको छ । आगामी जेठबाट छायांकन तयारी सहित यो चलचित्रको निर्माण घोषणा गरिएको हो । चलचित्रमा नाम चलेका कलाकारहरुको नै अभिनय रहने जानकारी उनले दिएका छन् ।

चलचित्रका लागि अहिलेसम्म धेरै कलाकारसँग मौखिक सहमती भैसकेपनि लिखित सम्झौता हुन बाँकी रहेकाले केही समयपछि सार्वजनिक गर्ने तयारी भैरहेको उनले जानकारी दिए । निर्माता दीपक लम्साल लामो समयदेखि भारतको मुम्बईमा बसेर बलिउड र दक्षिण भारतीय चलचित्रको नेपाल रिलिजको चाँजोपाजो मिलाउँदै आइरहेका छन् । उनले बलिउड चलचित्र नेपाल रिलिजमा लामो समय काम गरेपछि पहिलो पटक नेपाली चलचित्र निर्माणको तयारी गरेका हुन्।

रियल इन्टरटेनमेन्ट प्रालीको ब्यानरमा निर्माण हुने चलचित्रलाई जुनिम गहतराजले निर्देशन गर्ने भएका छन् । उनले निर्माण तथा निर्देशन गरेको चलचित्र ‘ताण्डवम्’ हालै प्रदर्शनमा आएको थियो । ‘ताण्डवम् ‘मा जुनिमको निर्देशकिय क्षमता हेरेर नै आफ्नो चलचित्र निर्देशनमा जिम्मेवारी सुम्पेको निर्माता लम्सालले बताए ।