किन सर्यो जेठ ९ बाट ‘के घर के डेरा २ ?

दिपेन्द्र के खनालको निर्देशनमा तयार भएको चलचित्र ‘के घर के डेरा: घर नम्बर २’ ले केहि दिन अगाडी जेठ ९ गतेलाई आफ्नो रिलिज मिति तय गरेको थियो। निर्देशक खनाल स्वयम् ले यसको जानकारी आफ्नो सामाजिक संजाल मार्फत दिएका थिए। तर तोकिएको मितिमा उक्त चलचित्र प्रदर्शन नहुने भएको छ । यो चलचित्र एक हप्ता अगाडी अर्थात् जेठ २ गतेबाट प्रदर्शनमा आउने भएको छ।

चलचित्र रिलिज मिति अगाडी सर्नुको कारण २ वटा मानिएको छ । पहिलो जेठ १५ गतेबाट चलचित्र ‘महाभोज’ रिलिज हुँदैछ। दुवै चलचित्रको प्रमुख भूमिकामा एकै कलाकार रहेका छन्। आर्यन सिग्देल र खगेन्द्र लामिछाने दुवै जना दुई चलचित्रमा प्रमुख भूमिकामा रहेका छन्। दोश्रो जेठ ९ गते चलचित्र ‘नरसिंहा: अवतार’ सार्वजनिक हुँदैछ। यो राजेश हमालको ८ बर्षपछिको कमब्याक चलचित्र हो। राजेशको कमव्याकको सम्मान चलचित्रको टिमले गरेको हुनसक्छ। चलचित्रका वितरक करण श्रेष्ठले पनि माहनायक हमालको सम्मानका लागी चलचित्रको रिलिज मिति सारिएको उल्लेख गरेका छन्।

‘के घर के डेरा २’ मल्टिस्टारर रहेको छ। आर्यन र खगेन्द्र सहित चलचित्रमा निश्चल बस्नेत, केकी अधिकारी, उपासना सिंह ठकुरी, प्रकाश घिमिरे, श्रृजना नापित, संजोग रसाइली, रुविना घिमिरे लगायतको अभिनय रहेको छ । चलचित्रमा बुद्धि सागरको कथा लेखन रहेको छ ।