छायांकनको तयारीमा ‘जनै हराएको बाहुन’, सुशांक मैनालीको प्रवेश

हिमाल न्यौपानेको डेव्यु निर्देशनमा तयार हुने चलचित्र ‘जनै हराएको बाहुन’ छायांकनमा जाने तयारीमा रहेको छ। कलाकारको बलियो लाइनअप लिएर निर्माण हुँदै रहेको चलचित्र तीजको अवसरमा भदौमा रिलिज हुँदैछ। आमा र छोराबीचको इमोसनल कथा बोल्ने चलचित्रको थिम पोह्स्तर सार्वजनिक भैसकेको छ। आमाको सुखका लागि छोराले गर्ने संघर्षको कथा भन्ने चलचित्र चैतको अन्त्यबाट छायांकनमा जानेछ। यो चलचित्रको छायांकन ४० दिनमा सक्ने तयारी निर्माण टिमले गरेको छ। यो चलचित्रको असोसियट निर्देशक ‘प्रेमगीत ३’ अभिनेता मनिष राउत छन् ।

चलचित्रमा विजय बराल, केकी अधिकारी, निरुना मगर, गौरव पहारी, रेअर राई लगायतका कलाकारको अभिनय रहनेछ। अव यो चलचित्रमा कलाकार सुशांक मैनाली जोडिएका छन् । आफ्नो अब्बल अभिनयका कारण नेसनल अवार्ड लगायत अन्य राष्ट्रिय तथा अन्तराष्ट्रिय अवार्ड जितेका मैनाली लामो समयपछि नेपाली चलचित्रमा देखिन लागेका हुन्। उनले ‘साँगुरो’, ‘टलकजंग भेर्सस टुल्के’ , ‘सन्त्रास’ , ‘को आफ्नो’ लगायत चलचित्रमा काम गरेका छन्।

पेपरक्लिप प्रालिले निर्माण गर्न लागेको चलचित्र हरितालिका तीजको अवसर पारेर आगामी भदौ १० गते रिलिज हुने छ । चलचित्रको कथा, पटकथा र संवाद भानुभक्त ढकालले लेखेका छन् भने चलचित्रमा थानेश्वर गौतमको संगीत रहने बताइएको छ। आदित्य फिल्म्स निर्माता रहने चलचित्रको छायांकन चैत्र २५ गतेबाट सुरु हुनेछ भने चलचित्रको छायांकन पाल्पा र काठमाडौंमा गरिनेछ।