हसनको मुख्य भूमिका रहेको चलचित्र ‘वन अफ द मिलियन्स’को छायांकन सम्पन्न

‘अलबिदा’ बाट चलचित्र फिल्म क्षेत्रमा प्रवेश गरेका नायक हसनराजा खान अभिनित चलचित्र ‘वन अफ दि मिलियन्स’को छायांकन अमेरिकामा सकिएको छ ।

११ दिन लगाएर चलचित्रको छायांकन गरिएको नायक खानले जानकारी दिएका छन् । यो चलचित्रलाई विशाल सापकोटाले निर्देशन गरेका हुन् । एक नेपाली आप्रवासीको अमेरिका पुग्ने सपनाको कथालाई यो चलचित्रले भन्छ । अवैध बाटो अपनाएर आफ्नो भविष्य बनाउने आशामा घरपरिवार छाडेर अमेरिका पुग्नका लागि जोखिम मोल्ने नेपालीको कथामा यो चलचित्र बनेको निर्माणपक्षले बताएको छ । यो चलचित्रमा हसनको साथमा कलाकार सुवास थापाको पनि मुख्य भूमिका छ ।

यो चलचित्रमा हसन र सुवासको साथमा अन्य २० जना अमेरिकामा नै रहेका कलाकारहरुले अभिनय गरेका छन् । सन् २००९ मा काठमाडौंमा आयोजित ‘मिस्टर क्यापिटल’ जितेका हसनले ‘अलबिदा’पछि ‘रोमियो’ नामक चलचित्रमा अभिनय गरेका थिए । यो चलचित्रबाट पनि आफूलाई दर्शकहरुले अझै बढी साथ दिने हसनको विश्वास छ ।