हलमा दर्शक भेट्दै एन्जिला, चार दिने नेपाल बसाइमा कस्तो छ सेड्युल?

राष्ट्रिय महिला फुटबल टिमकी कप्तान एन्जिला तुम्बापो सुब्बा नेपाल आइपुगेकी छिन्। ग्रिसमा रहेकी एन्जिला स्वयम्ले अभिनय गरेको चलचित्र ‘अन्जिला’ ले हलमा दर्शकको भव्य साथ पाइरहेको छ। बक्स अफिसमा सुपरहिट सावित भैसकेको चलचित्रका दर्शकसँग साक्षात्कार गर्न एन्जिला नेपाल आएकी छन् ।व्यावसायिक फुटबल खेल्न ग्रिस पुगेकी उनी शुक्रबार बिहान काठमाडौं आइपुगेकी हुन् । उनलाई चलचित्रका निर्देशक मिलन चाम्स र निर्माता प्रेमकुमार श्रेष्ठले त्रिभुवन विमानस्थलमा स्वागत गरेका थिए ।

विमानस्थलबाट बाहिरिने क्रममा एञ्जिलाले दर्शकसँग भेट गर्नकै लागि आफू नेपाल आएको बताइन् । उनले भनिन्, ‘चलचित्रलाई दर्शकले दिनुभएको मायाकै कारण म छोटो समय मिलाएर ग्रिसबाट नेपाल आएकी हुँ । चलचित्र राम्रो चलेको देख्दा खुसी लागेको छ ।’ उनले चलचित्र हेरेर दर्शकहरु रोएको भिडियो हेर्दा आफू पनि भावुक भएको बताइन् ।
उनको अभिनयलाई लिएर पनि प्रशंसा भइसकेको छ । उनले सञ्चारकर्मीसँगको कुराकानीमा आफूले विगत सम्झिएर अभिनय गरेको बताइन् । उनले भनेकी छन्, ‘निर्देशक मिलन सरले तिमी अभिनय नगर, जे भोगेको छौ त्यही सम्झिएर काम गर भन्नुभएको थियो । मैले पनि विगतको कुरा सम्झिएर काम गरेँ ।’

निर्देशक मिलन चाम्सले एन्जिला र उनको आमालाई एकसाथ फिल्म हेराउने ठूलो इच्छा रहेको बताए । ‘एन्जिलाको ममीले फिल्म हेर्नुभएको छैन । उहाँ टिकटकमा आएका फिल्मका क्लिप्सहरु हेरेरै रुनुहुन्छ रे । फिल्म हेर्नै सक्दिनँ भन्नुभएको छ भन्ने सुनेको छु । एन्जिलासँगै उनको ममीलाई पनि फिल्म हेराउने मेरो इच्छा छ,’ उनले भने ।

चार दिनको नेपाल बसाइको क्रममा एन्जिलाले शुक्रबार काठमाडौँ उपत्यकाका विभिन्न हलहरूमा पुगेर दर्शकसँग भेट गर्नेछिन् । शनिबार पनि काठमाडौँ रहने उनी आइतबारदेखि भने पूर्वी तथा पश्चिम नेपालका हलहरूमा पुग्नेछिन् । उनले पोखरा, नेपालगन्ज, बिर्तामोड, धरान, इटहरी, चितवन र दाङमा पुगेर दर्शकसँग भेट गर्ने कार्यक्रम रहेको निर्देशक चाम्सले बताए ।

यतिबेला एन्जिला काठमान्डौका हलमा दर्शक भेटिरहेकी छिन्। उनलाई भेटेर दर्शकहरु अंगालोमा बेरिरहेका छन् भने तस्विर खिचाउनेको पनि भिड रहेको छ। उनले पनि हलमा पुगेर जीवनमा कहिले हिम्मत नहार्न र आफु र आफ्नो क्षमतालाई पहिचान गर्न अनुरोध गरिरहेकी छिन्।