अनमोल केसीको ‘जेरी अन टप’ को छायांकन सकियो, बजेट ६ करोड पुग्यो !

मल्टिस्टारर चलचित्र ‘जेरी अन टप’ को छायांकन सकिएको छ। दुई गीतको छायांकन बाँकी राख्दै चलचित्रको ६० दिनमा सम्पूर्ण सिनहरु खिचिसकिएको छ। सोमबार मुस्ताङमा अन्तिम दृश्य खिचेर कलाकार सहितको टिम काठमाडौं फर्किएको हो। अव चलचित्रको दुई गीतमध्ये एकको छायांकन भारतको पुडुचेरी र अर्कोको काठमाडौंमा हुनेछ।

मुस्ताङ, सगरमाथा बेसक्याम्प र काठमाडौंमा चलचित्रको छायांकन गरिएको छ। चलचित्रका केहि दृश्यका लागी महँगो लागतमा काठमान्डौमा सेट तयार पारिएको थियो। चलचित्रको बजेट झन्डै ६ करोड पुगेको छ। कलाकारको पारिश्रमिकमा नै निर्माण टिमले महँगो बजेट खर्च गरेको छ। सरोज न्यौपानेको निर्माणमा तयार भएको चलचित्रलाई सुयोग गुरुङले निर्देशन गरेका छन् । चलचित्रमा अनमोल केसी, आँचल शर्मा, जसिता गुरुङ, केदार घिमिरे, भुवन केसी, सुरक्षा पन्त, उषा खड्गी लगायतको अभिनय छ ।

चलचित्रको विदेश प्रदर्शनको अधिकार हङकङको एलजी एसोसिएट्सले खरिद गरेको छ । अष्ट्रेलिया बाहेकको सम्पूर्ण राइट्स विक्री भएको छ। विदेश प्रदर्शन अधिकार बाट जाँदै आधा लगानी उठेको निर्माण टिमले बताएको छ। चलचित्रको प्रदर्शन मिति हालसम्म तय भएको छैन।