रिलिज मिति सार्वजनिक गर्दै ‘जन्ते बाख्रो’ को पहिलो झलक सार्वजनिक

सिमोस सुनुवारको निर्देशनमा तयार भएको चलचित्र ‘जन्ते बाख्रो’ को रिलिज मिति तय गरिएको छ। चलचित्रको फस्टलुक पोष्टर सार्वजनिक गर्दै निर्माण टिमले जेठ २३ गतेलाई प्रदर्शन मिति तय गरेको छ। अहिलेसम्म यो मितिमा अन्य कुनै चलचित्रले रिलिज मिति तय गरेका छैनन्। चलचित्रमा सौगात मल्ल, आशिफ शाह र गरिमा शर्मा मुख्य भूमिकामा रहेका छन्। सार्वजनिक पोष्टरमा तीनै जनालाई स्थान दिईएको छ।

हिमालको काखमा सेटअप गरिएको पोस्टरमा आशिफ र गरिमालाई रोमान्टिक अवतारमा प्रस्तुत हुँदा सौगातले निराश भावमा उनीहरुलाई हेरिरहेका छन् । उनीहरुको बीचमा चस्मा लगाएको बाख्रोलाई देखाइएको छ । निर्माण टिमले यसलाई बेहुली भित्र्याउने दिन जन्तीलाई खुवाइने भोजलाई जन्ते बाख्रो रुपमा चित्रण गर्न खोजेको बुझिन्छ । मुईन इन्टरटेनमेन्टको प्रस्तुति रहने ‘जन्ते बाख्रो’ सामाजिक कमेडी कथावस्तुमा निर्माण भएको छ ।

सन्तोष गौतम निर्माता रहेको चलचित्रमा रमा थपलिया, लोकेन्द्र लेखक, कमल देवकोटा, विशाल पहाडी, रुशा न्यौपाने, कुसुम शर्मा, स्नेहा जोशी, समापिका गौतम, कुशल गजमेर लगायतका कलाकारहरुको अभिनय रहेको छ।
प्रदीप भारद्धाजको कथा, पटकथा र संवाद लेखन रहेको चलचित्रमा हरि हुँमागाईको डिओपी, उत्तम हुँमागाईको सिनेमाटोग्राफी, सुनिल शिवभक्तिको सम्पादन रहेको छ।