‘अभिमन्यु’ मा गौमाया गुरुङ अनुबन्धित

सेभेन सिज सिनेमाको प्रस्तुति निर्माण हुने चलचित्र ‘अभिमन्यु’ मा अभिनेत्री गौमाया गुरुङको प्रवेश भएको छ। निर्माण टिमले सार्वजनिक गरेको पहिलो कलाकारमा गौमाया रहेकी छिन्। ‘कबड्डी ४’ बाट चर्चामा आएकी गुरुङ पछिल्लो समय नेपाली चलचित्रमा निकै सक्रिय रहेकी छिन्।

“हाम्रो चलचित्रका लागि हामीले कलाकार छनोट गर्न सुरु गरेका छौँ । पहिलो कलाकारका रूपमा गौमायाजीलाई साइन गराएका छौँ,” निर्माता विनोद पौडेलले भने, “अन्य कलाकार पनि अब अनुबन्ध गर्दै जानेछौँ ।”

ब्लकबस्टर चलचित्र ‘पूर्ण बहादुरको सारङ्गी’ निर्माता पौडेलले ‘अभिमन्यु’ निर्माण गर्न लागेका हुन् । भदौ २७ गतेलाई चलचित्रको रिलिज मिति तय गरिसकिएको छ।

चलचित्रको थिम पोस्टरले चक्रव्यूह र पैसाबीचको संघर्षलाई प्रस्तुत गरेको छ । पैसाको प्रलोभनमा चक्रव्यूहमा फस्ने र त्यहाँबाट उम्किन खोज्ने पात्रले गर्ने संघर्षको कथा चलचित्रले भन्नेछ । यो चलचित्र विश्वभर एक साथ हिन्दी र नेपाली भाषामा रिलिज हुनेछ ।

सुशान्त गौतमको डेव्यु निर्देशनमा टायर हुने चलचित्रमा मुकेश खनालको लेखन, क्रियटिभ निर्देशक मदन थापा र शरद महतोको डिओपी रहने छ । विनोद पौडेल र गुञ्जन गिरी निर्माता रहेको चलचित्रमा रमेश चौलागाई र हरि श्रेष्ठ सह–निर्माता रहेका छन् ।