युट्युब ट्रेन्डिङको दोश्रो नम्बरमा ‘वसन्त’ ट्रेलर

चैत्र २२ गतेबाट रिलिज तयारीमा रहेको चलचित्र ‘वसन्त’ को ट्रेलर केहि दिन अगाडी सार्वजनिक गरिएको थियो। भव्य कार्यक्रम र ‘वसन्त- साँझ’ को आयोजना गरेर रिलिज गरिएको ट्रेलरलाई दर्शकले साथ दिएका छन्। ४ लाख ४५ हजार बराबरको भ्युज पाएको चलचित्रको ट्रेलर युट्युबको ट्रेन्डिङमा रहेको छ।

वसन्तको ट्रेलर युट्युवको मुभिज सेक्सन अर्न्तगत २ नम्बर ट्रेन्डिङमा छ । पहिलो नम्बरमा सलमान खानको चलचित्र ‘सिकन्दर’ को ट्रेलर रहेको छ। वसन्तको ट्रेलरले समाजको परिवेश र कथा बोलेको भन्दै दर्शकले तारिफ गरिरहेका छन्। २४ हजार बढी लाइक पाएको ट्रेलरमा ३५ सय बढी प्रतिक्रिया दर्शकले दिएका छन्।

गायक तथा अभिनेता प्रकाश सपुतको डेव्यु निर्देशकिय चलचित्रमा प्रकाश सपुत, स्वस्तिमा खड्का, प्रभात पाल ठकुरी, श्री शिभान्सी, उर्मिला लाम्गादे र खड्क बहादुर पुन (खबपु), अनुप बराल, कमलमणी नेपाल, प्रकाश घिमिरे, विशाल पहारीको अभिनय रहेको छ । गलबन्दी प्रोडक्सनको प्रस्तुति रहने सोसल ड्रामा चलचित्रमा कथा, पटकथा र संगीत पनि निर्देशक सपुतले नै तयार पारेका हुन् । विपन्न विश्वकर्मा समुदायको छोराको लेखक बन्ने सपना र लक्ष्य हासिल गर्न उसले गर्ने संघर्षको कथा चलचित्रले भन्ने छ । चलचित्रको निर्मातामा मोहन विश्वकर्मा र बिन्दु बोहोरा तथा कार्यकारी निर्मातामा अनुरोध भट्टराई, नाना थकाली र विरेन्द्र नारायण श्रेष्ठ छन् ।