प्रकाश सपुतको ‘वसन्त’ ट्रेलर: जातीय व्यवस्था माथी प्रश्न, ‘समाज भर्सेज समाज’

सर्जक प्रकाश सपुत आफ्ना सिर्जना मार्फत समाजलाई केहि न केहि प्रश्न उठाइरहेका हुन्छन्। बिशेष गरि समाजमा व्याप्त रहेको जातीय व्यवस्थामाथी प्रकाशले प्रश्न गरेका हुन्छन्। संगीत सिर्जनामा आफुलाई अब्बल सावित गरेका सपुत पछिल्लो समय चलचित्र अभिनयमा पनि व्यस्त रहेका छन्। उनै सपुतको निर्देशनमा तयार भएको चलचित्र ‘वसन्त’ चैत्र २२ गतेबाट रिलिज हुँदैछ। वसन्तको ट्रेलर सार्वजनिक गरिएको छ।

शुक्रबार एक कार्यक्रमको आयोजना गर्दै चलचित्रको ट्रेलर सार्वजनिक गरिएको हो। २०६२/०६३ को परिवेशमा यो तयार पारिएको छ। माओवादी जनयुद्ध र जनआन्दोलनको व्याप्त समयको बीचमा चलचित्रको कथा तयार पारिएको छ। ४ मिनेट लामो ट्रेलरले जातीय व्यवस्थाले उक्त समयमा पारको प्रभावको कथा समेटेको छ।

जातकै कारण हुने भेदभाव, भिन्न जात विचको प्रेम र आउने उतारचढावको कथालाई ट्रेलरमा मर्मस्पर्शी ढंगले प्रस्तुत गरेको छ। वसन्त र शानित पात्रको वरिपरि घुमेको ट्रेलरले दुवैको प्रेममा आउने बाधा र जातिय व्यवस्था हटाउन शान्ति पात्रले गरेको विद्रोहलाई ट्रेलरमा समावेश गरिएको छ।

चलचित्रमा प्रकाश सपुत , स्वस्तिमा खड्का, प्रभात पल ठकुरी, श्री शिभान्सी, उर्मिला लाम्गादे, खड्क बहादुर पुन (खबपु), अनुप बराल, कमलमणी नेपाल, प्रकाश घिमिरे लगायतको अभिनय छ । प्रकाश स्वयंको लेखन तथा संगीत रहेको चलचित्रमा मोहन विश्वकर्मा र विन्दू बोहोरा (सपूत) निर्मातामा छन् । विरेन्द्र नारायण श्रेष्ठ, अनुरोध भट्टराई र न्यान्सी शेरचन चलचित्रको कार्यकारी निर्माताको रुपमा रहेका छन्। सुसन प्रजापतिले खिचेको चलचित्रलाई प्रविन भट्टले सम्पादन गरेका छन्। चलचित्रको मुख्य सहायक निर्देशक सुनिल बिक हुन् ।