२०० बढी शो सहित रिलिज भयो ‘होस्टेल ३’, कस्तो छ अकुपेन्सी ?

उच्च ब्रान्ड भ्यालु भएको च्ल्चहित्र ‘होस्टेल’ को तेश्रो सिरिज ‘होस्टेल ३’ आजबाट प्रदर्शनमा आएको छ। देशभरका २०० बढी हलमा चलचित्र रिलिज भएको छ। बुधबारबाट अग्रिम बुकिङ्ग खुलाइएको चलचित्रको चर्चा र हाइप गज्जबको रहेको छ। बिहानीका शोमा सुखद दर्शकको उपस्थिति संगै दिवाकलिन शोमा राम्रो व्यापार गर्ने अनुमान प्रदर्शक र निर्माण टिम दुवैले राखेका छन्।

युवा पुस्तालाई लक्षित गरेर निर्माण गरिएको चलचित्रको टिम नयाँ रहेको छ। निर्देशक देखि कलाकारसम्म नयाँ रहेको चलचित्रको सोसल मिडिया हाइप राम्रो रहेको छ। यसको असर व्यापारमा पनि देखिनेमा निर्माण टिम आशाबादी रहेको छ। सशान कँडेलद्वारा निर्देशित चलचित्रमा पारस बम ठकुरी, सिम्रन पन्त, आशिष घिमिरे, पदम तामाङ, हेना नगरकोटी, रिहान गिरी, समा पराजुली लगायतको मुख्य भूमिका रहेको छ । प्रवीण खतिवडाले वार्डेनको भूमिका निभाएका छन् । आशिष पुरुष, रोहन श्रेष्ठ, उमर खान र सन्तोष बानियाँ पनि चलचित्रमा रहेका छन् ।

चलचित्रका निर्माता सुरेश कँडेल, कर्ण कार्की र गोविन्द अधिकारी हुन् भने सह-निर्मातामा शिशिर ज्ञवाली, अनीश सिग्देल, कुन्दन गुप्ता र गणेश मगर रहेका छन् भने शङ्कर कोइराला कार्यकारी निर्माता हुन्। यो चलचित्रको पटकथा तथा संवाद लेखेक तथा एसोसियट निर्देशक माधव शर्मा हुन्।

अर्जुन तिवारीले छायाङ्कन निर्देशन गरेको यस चलचित्रको सम्पादन विकास दाहालले गरेका छन् । चलचित्रमा हिमाल केसी एक्सन निर्देशक, अर्जुन पोखरेल, अल्मोडा राणा उप्रेती, महेश ज्ञवाली र किरण माइकल संगीतकार, प्रवीण सिंह र रोशन विश्वकर्मा कोरियोग्राफरको रुपमा रहेका छन्।