शोभित बस्नेतको नयाँ चलचित्र ‘पीआर’ को पोस्टर सार्वजनिक

शोभित बस्नेतको निर्देशनमा तयार हुने नयाँ चलचित्र ‘पीआरः पर्मानेन्ट रेसिडेन्ट’ को अफिसियल दुई पोस्टर सार्वजनिक भएको छ । सलोन सलिना फिल्मसको व्यानरमा निर्माण हुने चलचित्रमा रन्जित शाह (आरएफएम फयासिलिटी मेनेजमेन्ट अष्ट्रेलिया) र लेन वे डम्प्लिङ सिड्नी प्रस्तुतकर्ता रहेका छन्।

आगामी फेब्रुअरी ११ बाट छायांकनमा जाने चलचित्रको सार्वजनिक पोस्टरमा प्रमुख कलाकारहरु छन् । आर ए सुरज पौडेल, विनिता कार्की, आस्मा अधिकारी, पुजा चौधरी र राजन कुँवरलाई खुशीको भावमा प्रस्तुत गरिएको छ । अडिसनमार्फत छनोट भएका यी कलाकारहरु नयाँ हुन् । निर्देशक बस्नेतका अनुसार चलचित्रको छायांकन अष्ट्रेलियाको विभिन्न सहरमा र २५ प्रतिशत छायांकन नेपालमा हुनेछ ।

चार सय जनाको अडिसन मध्येबाट पाँच कलाकार छनोट भएको निर्देशक बस्नेतले जानकारी दिए। चलचित्रमा कुशल थापा, विमला खत्री, म्याक्स र नवीन घायलको पनि अभिनय छ । चलचित्रमा ए वान ग्रुप सर्भिसका प्रदीप दाहाल र इन्द्रेणी ग्रुप का लक्ष्मण सापकोटा निर्माता र एसिया प्यासिफिक इ कलेजका गणेश केसी कार्यकारी निर्माता छन् ।