अशोक दर्जीको डेव्यु चलचित्रमा निता ढुंगाना, टंकले निर्देशन गर्दै

सामाजिक संजालमा भाइरल हुँदै बाल गायनमा सफलता हासिल गरेका अशोक दर्जीको जीवन टंक बुढाथोकीले पुरै परिवर्तन गर्दिए। उनलाई छोरा बनाएर हुर्काएका टंकले उनलाई चलचित्रमा डेव्यु गराउदैछन्। ‘मन विनाको धन ठूलो कि धन विनाको मन’ चलचित्रको कलाकारको लाइनअप बलियो बन्दै गएको छ।

अशोक स्वयं प्रमुख भूमिकामा रहने चलचित्रमा सरोज खनाल, रमेश विश्वकर्मा, बुद्धि तामाङ, रवीन्द्र झा, एआर बुढाथोकी, शंकर श्रेष्ठ र साम्राज्ञी थापाको अभिनय रहनेछ । यो चलचित्रमा मुख्य अभिनेत्रीको रुपमा निता ढुंगाना अनुबन्धित भएकी छन्।
टंकको निर्माण र निर्देशन रहने चलचित्र माघ महिनाबाट छायांकनमा जानेछ। संगीतकार बुढाथोकीले यही चलचित्रबाट निर्देशनमा डेब्यु गर्न लागेका हुन् । ‘मन विनाको धन ठूलो कि धन विनाको मन’ गायक दर्जीले गाएको पहिलो गीत हो। ६ वर्षअघि रिलिज भएको यो गीत चर्चित बनेको थियो ।