तिहारमा दिपकराज गिरीको नयाँ चलचित्र, सरोजसंग सहकार्य

‘छक्का पन्जा’ सिरिजलाई केहि बर्ष बिश्राम दिने घोषणा दिपकराज गिरी र उनको टीमले गरिसकेको छ। सोहि कारण केदार घिमिरे ‘माग्ने बुढा’ धमाधम बाहिरी व्यानरका चलचित्रमा काम गरिरहेका छन्। यहि बीचमा दिपकराज गिरीले नयाँ चलचित्रका लागि सम्झौता गरेका छन्।

निर्माता सरोज न्यौपानेसंग उनले नयाँ चलचित्रका लागि सम्झौता गरेका हुन्। चलचित्रमा निर्मल शर्मा पनि रहनेछन्। ‘नयाँ बर्ष, नयाँ कामको सुरुवात’ भन्दै दिपकराजले निर्माता न्यौपाने र निर्मल शर्मासंगको तस्विर शेयर गरेका छन् । बाहिरी ब्यानरमा दिपक शेयरमा काम गर्ने गर्दछन्। यो चलचित्रमा उनले कसरी सम्झौता गरे त्यो खबर बाहिरिएको छैन। चलचित्रको यतिबेला स्क्रिप्टको काम भैरहेको छ।

तिहारमा रिलिज तयारीमा रहेको चलचित्रको स्क्रिप्ट दिपकले नै तयार गरिरहेका छन्। सरोजले केहि समय अगाडी चलचित्र ‘फनफनी घुमेर’ घोषणा गरेका थिए । तर यो चलचित्र निर्माण रोकेर उनले दिपकसंग नयाँ चलचित्रमा काम गर्न लागेको बुझिएको छ । दिपकराज गिरी बाहेक मुख्य भूमिकामा अन्य कलाकार र निर्देशकको जानकारी बाहिरिएको छैन। सरोजको एकल लगानी चलचित्रमा रहने बुझिएको छ। चलचित्रमा ‘छक्का पन्जा’ सिरिजका अन्य सदस्य रहने नरहने बारे कुनै जानकारी दिईएको छैन।