‘ऊनको स्वीटर’ को नयाँ गीत: विपिन र मिरुनाको अव्यक्त प्रेममा सुन्दर सिर्जना

चलचित्र ‘ऊनको स्वीटरको नयाँ गीत सार्वजनिक भएको छ। सुजन चापागाई र सुनिता थेगिमको स्वरमा रहेको नयाँ गीत ‘मखमली’ सार्वजनिक भएको हो । आफ्नो सृजना मार्फत दर्शकको मन जित्न सफल सुजनले यो नयाँ गीत पनि आकर्षक बनाएका छन्। तमु लोत्सार नजिकिदै गर्दा बिहिबार सार्वजनिक गरिएको गीत ‘कौडा/चुट्का’मा आधारित छ। ‘कौडा/चुट्का’ लोक सङ्गीतको एक विशेष र चर्चित विधा हो । यो भाकामा जीवनका विभिन्न भावनाहरू—प्रेम, वियोग, हास्यव्यङ्ग्य, व्यथा र सामाजिक परिवेशलाई सरल तरिकाले व्यक्त गरिन्छ ।

सार्वजनिक भएको गीतमा चलचित्रका अभिनेता विपिन कार्की र अभिनेत्री मिरुना मगर बीचको अव्यक्त प्रेमलाई व्यक्त गरिएको छ । गण्डक क्षेत्रमा चर्चित मानिने यो भाका यो चलचित्रमा भने पूर्वी नेपालको पाँचथरको संस्कृतिमा मिसाइएको छ । यस चलचित्रको छायाङ्कन पाँचथर र नेपाल भारत सिमाना फालेलुङमा गरिएको छ ।

गीतमा हर्क साउदको शब्द रचना र गायक चापागाईँकै सङ्गीत रहेको छ । यसका सङ्गीत निर्माता कोविद बज्र हुन् । दीप गुरुङले कोरियोग्राफी गरेको यस गीतको भिडियोमा अभिनेता विल्सन बिक्रम राईलाई रोचक भूमिकामा राखिएको छ ।

२०८२ सालको वैशाख २६ गते रिलिज हुने यस चलचित्रमा विपिन कार्की, मिरुना मगर, सुनिल पोखरेल, माओत्से गुरुङ, विल्सन विक्रम राई, प्रेम सुब्बा, एलेक्स पारस, परीक्षा लिम्बु, सुरज तमू, शारदा देवी सिलवाल, भावना खपाङ्गी मगरलगायतको अभिनय रहेको छ । नवीन चौहानले निर्देशन गरेको ‘ऊनको स्वीटर’ आर्टमाण्डू प्रा.लि.ले निर्माण गरेको पहिलो फिचर चलचित्र हो।