हराएका हिरो: अल्मलिएको चलचित्र करियर

नेपाली चलचित्र क्षेत्रमा कलाकार आउने र जाने क्रम चलिरहन्छ। आफ्नो समयको सहि सदुपयोग र आफ्नो चर्चालाई सम्हाल्दै अगाडी बढ्न यो क्षेत्रमा उति सहज रहेको छैन। नव प्रवेशी देखि आफुलाई चर्चामा राखेका सम्म कलाकारहरु समय अनुसार हराउदै जान्छन्। कोहि चर्चाका कारण त कोहि आफ्नो अभिनयका कारण सफलता हासिल गर्दागर्दै पनि चलचित्र क्षेत्रबाट हराउने अथवा टाढिने गर्दछन्।

आज यो सामग्रीमा हामी केहि त्यस्ता नायकको चर्चा गर्दैछौ जसलाई नेपाली चलचित्र क्षेत्रको लामो यात्रीको रुपमा हेरिएको थियो। तर अहिले चलचित्र क्षेत्रमा कहिँ कतै उनीहरुको बाटो अल्मलिएको छ।

१. आकाश श्रेष्ठ

नेपाली चलचित्र क्षेत्रमा केहि बर्ष अगाडी सम्म आकाश श्रेष्ठको चर्चा र खोजी उच्च रहेको थियो। म्युजिक भिडियो र चलचित्र क्षेत्र दुवैमा उनको डिमाण्ड लोभलाग्दो रहेको थियो। अभिनेत्री पूजा शर्मासंग चलचित्रमा जोडी जमेपछि त उनको करियर यात्रा रफ्तारमा रहेको थियो । एकअर्कोको बर्थडेमा संगै हुने देखि फ्यानहरुको गिफ्टको ओईरो रहेको थियो। दुवैलाई लिएर चलचित्र बनाउने निर्माताको होडबाजी थियो। तर जसै सम्बन्ध चिसियो आकाशको करियरमा पनि ब्रेक लाग्यो। लगातार चलचित्रमा असफलता भोगेका आकाशको हात यतिबेला रित्तो रहेको छ । यदाकदा म्युजिक भिडियोमा उनले काम गरिरहेका छन् । तर चलचित्रमा ब्रेक लागेको उनको यात्रा कहिले पहिलो गेयरमा चल्ने हो त्यो समयले बताउला।

२. आशिरमान देशराज जोशी

अग्लो अनि आकर्षक बडी, सुन्दर मुस्कान अनि ठीकठाकको अभिनय, आशिरमानले जसै नेपाली चलचित्र क्षेत्रमा प्रवेश गरे एउटा आकर्षक हिरोको प्रवेश भएको आंकलन भयो। युवतीहरु उनलाई हेर्न र भेट्न आतुर थिए। ‘ग्याङ्गस्टार ब्लुज’ चलचित्र मार्फत नेपाली रजतपटमा प्रवेश गरेका जोशीले पहिलो चलचित्रमा नै केहि अवार्ड आफ्नो हातमा पारे। ‘द ब्रेकअप’ उनको अर्को चलचित्र रहेको थियो । दुवै चलचित्रमा उनले आफ्नो कामले दर्शक निराश पारेनन्। तर खै उनि स्वयम् लाई यहि चलचित्र क्षेत्रबाट निराशा मिलेजस्तो छ। यतिबेला उनि मुम्बईमा बस्दै आएका छन्। आशालाग्दो हिरो नेपाली चलचित्रमा फेरी देखिने हुन् या हैनन् त्यो हेर्न बाँकी रहेको छ।

३. सलिनमान बनियाँ

डेव्यु चलचित्रमा नै आफुलाई अब्बल सावित गरेका सलिनमान आफ्नो स्टाइल र लुक्सका कारण नै चर्चामा रहेका थिए। लभस्टोरी चलचित्रबाट आफुलाई एक्सनमा पनि ठिकठाक प्रस्तुत गरेका बनियालाई लिएर चलचित्र निर्माण गर्ने निर्माताको भीड थियो । अहिले पनि यदाकदा निर्माता उनलाई लिएर चलचित्र निर्माण गर्ने कोसिसमा हुन्छन्। अभिनेता सलोन बस्नेतले त उनलाई लिएर चलचित्र निर्माणको घोषणा नै गरेका थिए। तर खै सलिनलाई के उदेग लाग्यो यो क्षेत्रबाट यदाकदा पार्टी बाहेक उनि आफुलाई यो क्षेत्रबाट टाढा नै राख्ने गरेका छन्।

४. पुष्प खड्का

अब्बल अभिनयमा आफुलाई पुष्पले पटक पटक प्रमाणित गरे। सफल चलचित्र पनि दिए। हजारौ म्युजिक भिडियो हुँदै चलचित्रमा पनि आफुलाई सफल बनाएका पुष्पको करियर यतिबेला धर्मराएको छ। उनी कुनै चलचित्र देखिएका छैनन्। उनलाई चलचित्र निर्माताले किन यसरी अविस्वास गरिरहेका छन् त्यो सायद उनि आफै पनि बेलाबखत सोचिरहेका होलान्। राष्ट्रिय अवार्ड समेत जित्न सफल पुष्प अव फेरी चलचित्रमा कहिले सक्रिय होलान् समयले बताउला।