लक्ष्मीको मनछुने कवितामा ‘श्री बुकुरो’ टिजर

सुदीप भुपाल सिंहको निर्देशनमा तयार भएको चलचित्र ‘श्री बुकुरोः द होम कलिङ’ को टिजर सार्वजनिक गरिएको छ । मुख्य कलाकार लक्ष्मी गिरीले वाचन गरेको कविताको अंश प्रस्तुत गरिएको टीजरमा लक्ष्मी संग आशिर्वाद क्षेत्रीलाई प्रस्तुत गरिएको छ। दुवै गाउँ फर्किरहेको दृश्य प्रस्तुत टिजरले चलचित्रले ग्रामीण परिवेशको कथा उठाएको देखिन्छ ।

रेञ्जको व्यानरमा निर्माण भएको यो चलचित्रमा रुवी सेनको निर्माण रहेको छ। चलचित्रमा आर्शीवाद र लक्ष्मीको साथमा निकिता आचार्य, प्रतिकराज आचार्य, रोशनी कार्की, राजन ईशान, दीपिका थापा, लय संग्रौला, मोहन निरौला, रामबाबु रेग्मी, रश्मि भट्ट, उत्तम केसी, गीता थापा लगायतका कलाकारको अभिनय छ ।

मुस्ताङ, बाग्लुङ, कास्की, दमौली, मकवानपुर र काठमाडौंमा छायांकन गरिएको चलचित्रलाई संजय लामा र राजेश श्रेष्ठले खिचेका छन्। रञ्जित गजमेर र बसन्त सापकोटाको संगीत रहेको चलचित्रको प्रदर्शन मिति तय गरिएको छैन।