धमाधम चलचित्रमा व्यस्त केदार: ‘माग्ने राजा’ मा शिर्ष भूमिकामा देखिदै

हास्य कलाकारको ठुलो समूहलाई एकठाउँमा राखेर दिपकराज गिरि र दिपाश्री निरौलाको टिमले चलचित्रको ट्रेन्ड नै बदल्दियो। क्यारेक्टर रोलमा हिरो, हिरोइनको वरिपरि राखिने पात्रको रुपमा परिचित हास्य कलाकार र उनीहरुको उपस्थितिको परिभाषा नै यो टिमले फरक बनाइदियो। यहि टिमले ‘छक्का पन्जा’ का ५ सिरिज सुपरहिट बनाईसकेका छन्। १ अर्वको कम्पनी बनाएका छन्। यो समुहले बाहिरि ब्यानरका चलचित्र खासै गरेनन्।

पछिल्लो समय भने अवस्था फेरिदै गएको छ। जितू नेपाल यो समुहबाट अलग भैसकेका छन् भने केदार घिमिरे यतिबेला बाहिरी व्यानरका चलचित्र धमाधम गरिरहेका छन्। त्यसो त छक्का पन्जा समुहले यो नाममा केहि बर्ष चलचित्र नबनाउने घोषणा गरिसकेको छ। दिपक-दिपा पनि ब्यानर बाहिरको चलचित्रमा काम गर्ने तयारीमा रहेको चर्चा रहेको छ। केदारले चलचित्र ‘जेरी अन टप’ को छायांकन सम्पन्न गर्न लागेका छन्। रोहित अधिकारीको निर्माणमा तयार हुने चलचित्र ‘माइतिघर’ मा उनि अनुबन्ध भैसकेका छन्।

ऋषिराज लामिछानेको निर्देशनमा तयार हुने चलचित्रमा उनि केहि समय अगाडी नै अनुबन्ध भैसकेका थिए। अव यो चलचित्रको नाम सार्वजनिक भएको छ। ‘माग्ने राजा’ शिर्षकमा यो चलचित्र निर्माण हुने पक्का भएको छ। उनी नै यो चलचित्रमा शिर्ष भूमिकामा रहेका छन्। यहि नामको अगाडी श्री राखेर ‘छक्का पन्जा’ टिम चौथो सिरिजको बेला चलचित्र निर्माण गर्ने तयारीमा रहेको चर्चा थियो तर त्यो सम्भव भएन र छक्का पन्जा ४ शिर्षकमा नै चलचित्र बन्यो। संयोग के भन्यो भने यहि शिर्षकमा निर्माण भएको चलचित्रमा केदार नै मुख्य भूमिकामा रहे।

धमाधम बाहिरी व्यानरमा काम गरिरहेका केदार आकर्षक पारिश्रमिक लिने गर्दछन् । अब उनका चलचित्र व्यवसायिक हिसाबले कस्तो रहनेछन् र उनको उपस्थिति चलचित्रमा कस्तो रहनेछ त्यो भने भविष्यले नै बताउनेछ।