‘कार्साङ’ टिजर : भिन्न जीतु, दिया र दयाको अब्बल प्रस्तुती

पौष २३ गतेबाट रिलिज तयारीमा रहेको चलचित्र ‘कार्साङ’ को टिजर निर्माण टिमले सार्वजनिक गरेको छ। दयाहाङ राई, सिर्जना निङलेखु, जितु नेपाल र दिया मास्केको वरिपरि घुमेको चलचित्रको टिजर निकै बलियो देखिएको छ। टिजरमा दया झाँक्रीको भूमिकामा देखिएका छन्।

गरिबी र अभावले पिल्सिएको परिवारको जीवन चलाउन दयाले गर्ने संघर्ष, छोराको बिहेका लागि बनेको गरिवी बाधक र आफन्तले नपत्याएको ऋण र बेच्नुपरेको श्रीमतीको गरगहना र गाइवस्तुको कथालाई टिजरमा देखाइएको छ। अर्को जोडी जितु र दिया सन्तान नहुँदाको पिडामा रहेका छन्। दुवैको पात्रलाई सुन्दर ढंगले टिजरमा प्रस्तुत गरिएको छ। जितू नेपालको अभिनय निखारिएको देखिएको छ। चलचित्रमा उनि दर्शकका लागी सप्राइज प्याकेज बन्न सक्नेछन्।

शेर्पा समुदायको कथा उठाएको चलचित्रलाई यम शेर्पाले निर्देशन गरेका छन्। चलचित्रमा बुद्धि तामाङ, सृष्टि गौतम, डोमा ह्योल्मो, प्रेम लोप्चन, सुरवीर पण्डित, कविता आले, कर्मा शेर्पा लगायतको अभिनय रहेको छ।

यार्सा फिल्म्स र पुरुषोत्तम प्रधान फिल्म्सको प्रस्तुति रहेको चलचित्रमा पुरुषोत्तम प्रधान निर्माता रहेका छन्। चलचित्रमा प्रधानको नै छायांकन रहेको छ। गोविन्द बोहरा सह- निर्माता रहेको चलचित्रको कार्यकारी निर्मातामा आङछिरिङ शेर्पा रहेका छन् ।