दिनेशको ‘महाभोज’ मा कलाकारको बलियो लाइनअप, को को छन्?

नेपाली चलचित्र क्षेत्रमा निर्देशक दिनेश राउतले आफ्नो स्थान बलियो बनाएका छन्। सुपरहिट चलचित्र निर्देशनमा माहिर राउतको पछिल्लो चलचित्र ‘पूजार सार्की’ व्यावसायिक रुपमा सफल बनेको थियो। यो चलचित्रको सफलता पछि राउतले नयाँ चलचित्रको घोषणा गरेका छन्।

मल्टिटारर चलचित्र ‘महाभोज’ को निर्माण घोषणा उनले गरेका हुन्। यस अगाडी चलचित्रको नाम ‘गाउँ नै रमाइलो’ रहेको थियो। अव चलचित्रको नाम परिवर्तन गरेर ‘महाभोज’ राखिएको छ। दयाहाङ राई, आर्यन सिग्देल र मिरुना मगरलाई लिएर घोषणा गरिएको चलचित्रमा अब कलाकारको लाइनअप बलियो बनेको छ।

माघ १ गतेबाट छायांकन सुरु हुने चलचित्रमा खगेन्द्र लामिछाने, अञ्जना बराइली, मलिका महत, अनुपविक्रम शाही, बुद्धि तामाङ र कमलमणि नेपालले अभिनय गर्ने पक्का भएको छ। ‘प्रकाश’ र ‘पूजार सार्की’ का लेखक विकाश सुवेदीले चलचित्रको काठा तयार पारेका छन् । चलचित्रलाई हिमाल कडरियाले निर्माण गर्दैछन्।

उनले यस अगाडी ‘नाङ्गो गाउँ’ निर्माण गरेका थिए। उनको निर्माणमा तयार भएको अर्को चलचित्र ‘दुःखी आत्मा’ को केही हप्ताअघि मात्र छायांकन सकिएको थियो र फागुनमा रिलिज तय गरिएको छ। चलचित्रको रिलिज लक्ष्य जेठलाई राखिएको छ ।