ओटीटी प्लेटफर्म ‘एमएसएम’ मा सार्वजनिक हुँदै ‘अगस्त्य’

गतबर्षको चर्चित चलचित्र ‘अगस्त्य’ अब ओटीटी प्लेटफर्ममा रिलिज हुने भएको छ । भोलिबाट यो चलचित्र ‘एमएसएम एप’ मा रिलिज हुन लागेको हो । हलमा समेत दर्शकको सुखद साथ पाएको यो चलचित्रलाई ओटीटीमा पनि दर्शकले पनि रुचाउने विश्वास गरिएको छ ।

सौरभ चौधरीको निर्देशनमा तयार भएको यो चलचित्रमा सौगात मल्ल, नाजिर हुसेन, मलिका महत, प्रमोद अग्रहरी लगायतका कलाकारहरुको अभिनय छ ।
बजारमा आएको छोटो समयमा नै ‘एमएसएम एप’ लोकप्रिय बनिरहेको छ । यो एप दशैंको टिकाको अघिल्लो दिन बजारमा आएको थियो । हालसम्म २ लाख भन्दा बढी पटक एप डाउनलोड भइसकेको छ ।

यो एपमा ‘बेहुली फ्रम मेघौली, दिमाग खराब, महाजात्रा र घर ज्वाई’ सार्वजनिक भइसकेका छन् । आउँदो शुक्रबार यो एपबाट चलचित्र ‘फर्की फर्की’ सार्वजनिक हुँदैछ भने चलचित्र ‘बगान’ पनि सार्वजनिक गर्ने तयारी गरिएको छ ।