रिलिज मिति नजिकिदै गर्दा ‘केटी हराएको सूचना’ को सुटिङ्ग

कात्तिक ३० गतेबाट प्रदर्शनमा आउन लागेको चलचित्र ‘मिसिङः केटी हराएको सूचना’ को टिजर र ट्रेलर सार्वजनिक भैसकेका छन्। पटक पटक विभिन्न पोष्टर समेत सार्वजनिक गरेको चलचित्रको रिलिज मिति नजिकिदै छ। रिलिज मिति नजिकिदै गर्दा चलचित्रको एक गीतको छायांकन भैरहेको छ। ललितपुरको चापागाउँ क्षेत्रमा ‘सपनीमा’ बोलको गीतको छायांकन भइरहेको छ ।

यो गीत चलचित्रको कथावाचनमा महत्त्वपूर्ण रहेकाले छायांकन गरिएको निर्देशक दीपेन्द्र गौचनले जानकारी दिए । इन्दिरा जोशी र करण परियारको स्वर तथा करुण थापाको शब्द र संगीत रहेको रोमान्टिक भावको गीतमा चलचित्रका मुख्य अभिनेता नाजिर हुसेन र अभिनेत्री सृष्टि श्रेष्ठले अभिनय गरिरहेका छन् ।

भिडियोमा मानकृष्ण महर्जनको छायांकन तथा रामजी लामिछानेको कोरियोग्राफी छ । चलचित्रमा नाजिर र सृष्टिसँगै सञ्जय गुप्ता, रामनारायण ठाकुर, मदन ठाकुर, रिना रिमाल, कौशल्या ठाकुर, ललितादेवी मिश्र लगायतको अभिनय छ। नकिम उद्दिन कार्यकारी निर्माता रहेको चलचित्रमा निर्देशक गौचनको निर्माण रहेको छ ।