‘दुःखी आत्मा’ मा दया र आंचलसंगै जोडिए अनुपविक्रम शाही

निर्देशक दिपेन्द्र लामाको निर्देशनमा तयार हुने चलचित्र ‘दुःखी आत्मा’ मा अनुपविक्रम शाही अनुबन्धित भएका छन् । केही महिनाअघि शीर्ष भूमिकामा दयाहाङ राई र आँचल शर्मा चलचित्रमा अनुबन्धित भैसकेका छन्। कथाले मागेको चरित्रमा सुहाएपछि अनुपलाई लिएको निर्देशक लामाले जानकारी दिएका छन् ।

दयाहाङ र अनुपविक्रमले यसअघि ‘वीर विक्रम’ र ‘लप्पन छप्पन’मा सहकार्य गरेका थिए । यतिबेला उनीहरु चलचित्र ‘पिताम्बर’मा एकसाथ काम गरिरहेका छन् । यसमा आँचल पनि छिन् । ‘पिताम्बर’पछि तीनैजना ‘दुःखी आत्मा’को छायांकनमा जोडिनेछन् । यही भदौ २४ गतेदेखि काठमाडौं आसपासका क्षेत्रमा छायांकन गर्न लागिएको चलचित्रलाई कमेडी कथामा निर्माण गरिने जनाइएको छ ।

‘दुःखी आत्मा’ को निर्माता हिमाल कडरिया हुन् । पुस्कर गुरुङ, कविता आले, शिशिर बाङ्गदेल, बुद्धि तामाङ, आशान्त शर्मा, लोकेन्द्र लेखक, अंकित खड्का, लुनिभा तुलाधर, इंगीहोपो कोइच सुनुवार, आरती आचार्य, यासेली योङहाङ लगायतको अभिनय चलचित्रमा रहनेछ ।