विराज भट्टको ‘१२ गाउँ’ असोज २४ फूलपातीमा रिलिज तय

दशैंलाई रिलिज मिति भनेर प्रचार गरिदै आएको चलचित्र ‘१२ गाउँ’ ले आफ्नो रिलिज मिति कन्फर्म गरेको छ। विराज भट्टको निर्माण र निर्देशन रहेको चलचित्र असोज २४ गते फूलपाती बाट रिलिज हुने पक्का भएको छ।

मंगलबार बेलुकी एक पोस्टर सार्वजनिक गर्दै बिराजले असोज २४ गते चलचित्र रिलिज गर्ने घोषणा गरेका हुन् । डेव्यु नायक समिर भट्टको एक्सन अवतार प्रस्तुत गर्दै सार्वजनिक गरिएको पोष्टर आकर्षक रहेको छ। समिर बिराजका छोरा हुन्। चलचित्रमा समिरको साथमा विराज भट्ट, न्यान्सी खड्का, सनिसा भट्टराई लगायतका कलाकारहरूको अभिनय रहेको छ ।

१२ गाउँले आफ्नो रिलिज मिति तय गरेसंगै फूलपातीको समीकरण रोचक बनेको छ। छक्का पन्जा ५ र ज्वाई साब यो मितिमा आउने पक्का भैसकेको छ । दुई ठुला विदेशी चलचित्र पनि यो मितिमा रिलिजको तयारीमा रहेका छन्। आशातित चलचित्रहरु एकसाथ प्रदर्शनमा आउंदा व्यवसायिक हिसाब किताबमा प्रभाव भने पक्कै पर्नेछ।