एक्सनले भरिएको ‘रावायण’ टिजर, पल शाहको दोहोरो चरित्र

पल शाह र पुजा शर्मा मुख्य भूमिकामा रहेको चलचित्र ‘रावायण’ को एक्सनले भरिएको टिजर सार्वजनिक भएको छ। सार्वजनिक टिजरमा नायक पल शाहलाई दोहोरो अवतारमा देखाइएको छ । टीजर भरि पलको एक्सन प्रस्तुत गरिएको छ। हिंस्रक अवतारमा पलको एक्सन गज्जबको देखिएको छ। पल शाह, पूजा शर्मा, प्रमोद अग्रहरी, प्रकाश कुँवर, प्रियंका कार्की, निकिता चण्डक लगायतका कलाकारको अभिनय रहेको चलचित्रलाई पूजा शर्माले निर्माण गरेकी हुन्।

सुदर्शन थापाको निर्देशनमा तयार भएको चलचित्रमा पललाई रोमान्टिक अवतारमा हेर्दै आएका दर्शकले फरक स्वाद पाउनेछन्। टीजरलाई उत्कृष्ट बनाएको चलचित्र प्रति दर्शकको कौतुहलता बढ्ने पक्का रहेको छ। भदौ २१ गतेबाट रिलिज हुने चलचित्रको कार्यकारी निर्मातामा सशान पाठक रहेका छन्।

चलचित्रमा सुदर्शन थापाको कथा, प्रदीप श्रीवास्तवभाको पटकथा, सौरभ लामाको छायांकन, मिलन श्रेष्ठको सम्पादन, श्री श्रेष्ठको एक्सन छ । चलचित्रमा पूजालाई पत्रकारको भूमिकामा देखाइएको छ भने प्रियंकालाई जनकपुरे महिलाको रुपमा प्रस्तुत गरिएको छ।