‘दान्भी’ बाट आशावादी नव-नायक कुन्साङ
असार ७ गतेबाट नेपाली चलचित्र क्षेत्रमा एक नव-नायकको प्रवेश हुँदैछ। क्युट अनुहार, मिलेको शरीर र स्टाइलिस मोडल कुन्साङ बोमजम चलचित्र ‘दान्भी’ मार्फत नेपाली रजतपटमा डेव्यु गर्दैछन्। विभिन्न ब्रान्डमा मोडलिङ, ४० बढी म्युजिक भिडियोको अभिनय पश्चात उनी चलचित्रमा डेव्यु गर्दैछन्। पहिलो चलचित्रबाट नै कुन्साङ निकै आशावादी र उत्साहित छन् ।
चलचित्रमा ‘सारांश’ पात्रमा देखिएका कुन्साङ आफ्नो चरित्रबारे त खुल्दैनन्, तर आफ्नो काम दर्शकले स्वीकार्नेमा ढुक्क छन् । ‘दान्भीमा मेरो चाखलाग्दो चरित्र छ । तर अहिले भन्न मिल्दैन । चलचित्र हेरेपछि थाहा हुन्छ । मेरो चरित्र गम्भीरदेखि अलिक फरक मोडबाट बाँचेको किसिमको छ,’ कुन्साङ भन्छन् ।
![](https://i0.wp.com/www.mnmnepal.com/wp-content/uploads/2024/06/Kunsang-2.jpeg?resize=720%2C480&quality=100&strip=all&ssl=1)
सेन्ट जेभियर्सबाट पास आउट कुन्साङ स्कुल पढ्दादेखि नै नाटकका कलाकार र कराँतेका खेलाडी रहेछन् । ‘मैले कक्षा ३ देखि ११ सम्म मार्सल आर्ट गरें । ११ पछि मार्सल आर्टको काम रोकियो । मार्सल आर्टले अहिलेसम्म निरन्तरता दिइरहेको भए ‘दान्भी’मा एक्सन गर्न सजिलो हुन्थ्यो । तर बीचमा ग्याप भएपछि यही फिल्मका लागि मैले ६ महिना एक्सन प्राक्टिस गरें’, कुन्साङ भन्छन् ।
कुन्साङ दर्शकले फरक एक्सन थाहा पाउन ‘दान्भी’ हेर्नुपर्ने दाबी गर्छन् । ‘नेपाली चलचित्र क्षेत्रमा एक्सन फिल्म नआएको धेरै भएको थियो । त्यसमाथि महिलालाई लिडमा लिएर एक्सन भएको त धेरै कमी नै छ । पहिला रेखा थापाले ठूलो छाप छोड्नुु भएको थियो, त्यसपछि कोही अभिनेत्री एक्सनमा देखिनुभएको थिएन । पुजा जीले निकै मेहनतका साथ एक्सन गर्नुभएको छ । चलचित्रमा एक्सन कथावस्तु अनुसार गएको छ’, उनी भन्छन् ।
![](https://i0.wp.com/www.mnmnepal.com/wp-content/uploads/2024/06/Kunsang-3.jpeg?resize=720%2C480&quality=100&strip=all&ssl=1)
सेन्ट जेभियर्स पढ्दा उनले कक्षा ६ देखि १२ सम्म विभिन्न कथावस्तुका नाटकमा प्रमुख भूमिकामा अभिनय गरे । विदेशबाट आएका कलाकारले पनि उनीहरुलाई नाटक सिकाउँथे । त्यहीकारण उनले अभिनय सिक्नुपर्ने अवस्था खासै आएन । नेपाली र अङ्ग्रेजी नाटकको अभिनयले उनलाई ‘हिरो’ हुन्छु भन्ने नभए पनि चलचित्रमा चाहिँ अभिनय गर्छु भन्ने उसबेलै लागेको रहेछ ।
रुपेश तामाङ निर्देशित चलचित्र ‘दान्भी’ मा पुजा शर्मा, कुन्साङ बोमजम, किरण श्रेष्ठ, मोनासिला खतिवडा, राजाराम पौडेल, कालु रानालगायतका कलाकारको अभिनय छ ।