‘लण्डन टु पेरिस’ नयाँ गीत: साम्राज्ञी, निश्चल र गरिमाको त्रिकोणात्मक प्रेम

घनश्याम लामिछाने निर्देशित चलचित्र ‘लण्डन टु पेरिस’ को दोस्रो गीत ‘चाहान्छु यो माया’ सार्वजनिक गरिएको छ । रोमान्टिक गीतमा एसडी योगीको संगीत तथा राम अविरल बिष्टको शब्द रचना अनि संगीतकार योगी र नभिता पौडेलको स्वर रहेको छ । सार्वजनिक गीतमा साम्राज्ञी, निश्चल र गरिमा बीचको त्रिकोणात्मक प्रेमलाई देखाइएको छ ।

चलचित्रले ट्राभल लभस्टोरीको कथा पेस गर्छ । चलचित्रको कथा, पटकथा र संवाद प्रदीप भारद्धाजले लेखेका हुन् । चलचित्र मा साम्राज्ञी, निश्चल र गरिमाका अलवा कविर खड्का, रुष्मा थापा, मनिश श्रेष्ठ तथा मनिष गान्धीको प्रमुख अभिनय रहेको छ । निश्चल र गरिमाले यही चलचित्रबाट डेब्यू गरेका हुन् ।

एबी इन्टरनेश्नलको प्रस्तुति रहेको चलचित्रमा गौतम प्रोडक्शन र अर्चिड भेस फिल्मस् लिमिटेडको निर्माण सहकार्य रहेको छ । अमित बस्नेतले निर्माण गरेको चलचित्रमा आरोन बस्नेत, एरियाना बस्नेत तथा परी राना निर्माताका रुपमा रहेका छन् । चलचित्र जेष्ठ २५ गतेबाट रिलिज हुँदैछ ।