सकियो ‘मनसारा’ सुटिङ्ग, लिम्बू पहिरनमा मिरुना सजिदा धान नाच नाच्दै दयाहाङ

उपेन्द्र सुब्बाको डेव्यु निर्देशनमा तयार भएको चलचित्र ‘जारी’ बर्षकै सुपरहिट चलचित्र बन्यो। दयाहाङ राई र मिरुना मगर मुख्य भूमिकामा रहेको चलचित्रले लिम्बू संस्कृतिको कथा बोलेको थियो। यिनै तीन जनाको टिमअपले फेरी नयाँ चलचित्र ‘मनसारा’ निर्माण गरेको छ ।

बैशाख १ गतेलाई रिलिज मिति तय गरिएको चलचित्रको सुटिङ्ग सम्पन्न भएको छ। पुष २१ गतेबाट सुरु भएको सुटिङ्ग ३० दिनमा ललितपुर, काठमाडौं हुँदै पाँचथर पुगेर प्याकअप भएको हो। दयाहाङ राई र मिरुना मगरले शनिबार चलचित्रको अन्तिम दृश्य सुटिङ्ग गरेका थिए। यो चलचित्रले पनि लिम्बू संस्कृति भित्रको कथा उठान गरेको सार्वजनिक तस्विरबाट आंकलन गरिएको छ। सार्वजनिक एक तस्विरमा दयाहाङ ढाकाटोपी र दौरा-सुरुवालमा धान नाच नाचिरहेका छन् । लिम्बू समुदायमा धान नाच निकै लोकप्रिय रहेको छ।

मिरुना मगर सार्वजनिक तस्विरमा लिम्बू पहिरनमा देखिएकी छिन्। चलचित्रमा प्रविण खतिवडा, मेनुका प्रधान, हेमन्त बुढाथोकी लगायतको अभिनय रहेको छ । चलचित्रको निर्मातामा छायांकार शैलेन्द्र ध्वज कार्की रहेका छन् । विष्ण कुमार लिम्बु, मनोरथ पोखरेल, पर्शु अधिकारी, पिटर गुरुङ तथा जीवन लिम्बु थाक्लुङ चलचित्रको सह- निर्माताको रुपमा रहेका छन्। चलचित्र कबड्डी फिल्मसको ब्यानरमा निर्माण भएको छ।